Кино урлагийн дэлхийн хэмжээний супер од Хятадын жүжигчин Жэки Чаныг "Kung Fu Panda 2” киноны зураг авалтын үеэр хэт их ажлын ачааллаа дийлэхгүй зүрхний шигдээс болж нас барсан гэх мэдээлэл интернетээр цацагдсан юм. Түүнийг нас барсан гэсэн мэдээлэл гарсан даруйд түүний хэдэн мянган шүтэн бишрэгчид  Twitter, Facebook-ын хуудаснаа харууслын үгээ бичиж үлдээсэн ажээ. Гэтэл нэрт жүжигчин нас барсан гэсэн мэдээллийг үгүйсгэж "Facebook” хуудсанд "Жэки амьд сэрүүн, сайн байгаа. Онлайн мэдээллийн хэрэгсэл болон олон нийтийн харилцааны вэб сайтуудад гарсанчлан тэр зүрхний шигдээс тусаагүй, нас бараагүй. Жэки сайн байгаа, шинэ киноныхоо зураг авалтад бэлдээд завгүй байгаа” хэмээн албан ёсоор мэдэгдсэн байна. Түүнийг энэхүү албан ёсны мэдээлэл хийхээс өмнө 200 сая гаруй хүн ташаа мэдээлэл авсан байна. Ийнхүү Азийн төдийгүй Холливуудын нэрт жүжигчний талаар гарсан ташаа мэдээлэл нь олон мянган хүнийг цочролд оруулсан ч хайртай жүжигчин Жэки Чан нь нас бараагүй гэдгийг дуулсан хүмүүсийн санаа нь амарсан байна.